Muqdisho,(insidesomalia.org)-Qaar ka tirsan dadka ku dhaqan Degmada Dayniile ee Gobolka Banaadir ayaa bilaabay in ay isaga barakacaan guryahooda, kadib markii ay soo ifbaxeen warar sheegaya in howlgalo laga sameynayo Degmada Deyniile.

Goobaha dadkaan ay ka barakaceen waxaa ka mid ah deegaanada raadeylka,siisii iyo deegaano kale oo hoosyimaada Degmada Dayniile,waxaana dadkaan maanta barakacay ay u badnaayeen haween, Caruur iyo dad da’ah kuwaa soo inta badan u barakacay nawaaxiga magaalada Muqdisho.

Qaar ka mid ah dadkaanka barakacay Degmada Dayniile ayaa sheegay in hadii ay yimaadaan Ciidamo ka tirsan Dowladda KMG ay cabsi ka qaba in ay weerar ku soo qaadaan xoogaga hubeysan ee ka horjeeda joogitaanka Ciidamada Itoobiya iyo siyaasada Dowladda KMG ah, iyadoo weerarada iyo qaraxyada kadhanka ah Ciidamada Itoobiya iyo kuwa Dowladda ay wax yeelo ka soo gaarto dadka rayidka ah.

Degmada Dayniile ayaa waxa ay aheyd meel ay dadku ku barakaceen hasa haateen maanta ayaa Degmadaasi waxaa ka socda barakicii ugu xooganaa,waxaana dadkaan qaar ay sheegeen in ay aadaaan deegaanka Ceelasha biyaha ee gobolka Shabelaha Hoose.

Arinkaan barakaca ah ayaa waxa uu ku soo beegmayaa xili shalay Afhayeenka Ciidamada Booliska DKG Gaashaale Dhaxe Cabdullaahi xasan Bariise uu sheegay in Degmada Dayniile ay geyndoonaan Ciidamo ka tirsan Dowladda, kuwaasi oo baaritaano ka sameyndoona degmada Dayniile